Pra-Bepilih; Meda Ari Sebengkah Politik Iban enggau Pegai Tuai. (Pra-election: Preview on Iban Politics and Leadership)

Pra-Bepilih; Meda Ari Sebengkah Politik Iban enggau Pegai Tuai.
(Pra-election: Preview on Iban Politics and Leadership)
Dikarang; Junit anak Uli
Januari 2016

It is our nature. We are an egalitarian society. We are very individualistic. We say what we think and do what we want... Dayak also pratice negative egalitarianism. When someone goes up instead of following him, the Iban will pull him down. (James Masing dalam Star, 9 Mei 2006 dalam Nidzam & Zaini, 2009;115.)

Karang tu deka nguji mantaika pemansang politik Iban dikena ngaga jangka tumu senentang pengawa bepilih ti deka datai. Tajapan isu bedau ditemu ti deka dibantaika ari sesepiak sekalika pembangkang enggau perintah. Dalam meda utai tu, aku deka bejuraika berapa iti isu ti nyadi serekang politik Iban. Iyaka diatu kitai meda pemecah parti ari Taun 2014 enggau 2015 iyanya parti SPDP enggau serekang penemu ngaga parti baru iya nya TERAS. Pia mega, tangkup pengawa Parti PRS dalam politik kitai mega deka dilansa enggau meda asil politik enggau konsep ti deka dilansa bepelasarka berita enggau isu ti pansut maya karang tu ditulis. Arinya tadi, pemimpin Tuai Iban, Tuai Rumah, Pengulu sekalika ulih ngempung tauka enda majoriti pengundi ba menua Sarawak tu empu iyanya orang Iban.

Meda ba pemansang politik enggau isu, rayat ba menua pesisir ti kelimpah agi diuan bala orang Iban sigi dipandang sereta dijanji enggau perengka asas baka Ai, Api (Karan) enggau Jalai. Janji tu enda kala berubah ari penumbuh Malaysia nyentukka diatu ti manggai 53 taun ti udah. Isu tu mega enda nemu padam enda alah baka api kelita enti kulap-kulap deka diangkat baru. Taja bisi isu ti lebih besai agi tang tangkup isu maya pilihanraya enda kala ngerembai lebih ari kandang menua tauka sitak siti-siti. Nya alai, konsep adat enggau budaya semak amat enggau tuju politik demokrasi ti enda ulih dikerembaika enggau manah. Nyadi utai tu tadi mega ulih diseruri ari pegai parti ti bekuasa baka ti sama jalai enggau perintah pusat dikena nyadika jamin kuasa politik enggau ideologi ti betampung. Nya mih kebuah, pengawa patronaged-democracy mega digaga ba peringkat negeri sebaka enggau peringkat pusat ngena cara ti sama (Zaini & Nidzam,2009;59-75).

Ngambika bisi tuju dipeda konsep ti deka dibantaika ditu, kitai dulu beratika ruang enggau sandih penemu pasal tuai Iban ari dulu sampai diatu. Sebedau penatai Brooke suba orang Iban endang bisi sistem organisasi kediri emp, udah Brooke datai sekeda ari penambah tanggung pengawa dikena ngempung Tuai Rumah lalu bisi Pengulu iyanya diambi ari sistem laut (Robert Pringle, 2010;32-33). Utai tu bejalai manah nyentuk lantikkan diberi ngagai Temenggung kena megai Penghulu lalu udah bisi pembentukkan Malaysia utai tu agi dikemeranka sampai diatu. Lalu Tuai Rumah, Penghulu, Pemancha mesti diiktiraf ukai semina rayat iya aja tang mega pemimpin enggau wakil rayat endur nya mega, dudi meda Residen enggau District Officer meri gela. Pangkat sida tu mega diiktiraf enggau manah perintah pusat enggau negeri sereta nerima elawin tiap-tiap bulan.

Dalam tuju runding enggau penemu Iban, pemansang mesti dipeda segenda enggau mata sereta diperati enggau ulih dipegai enggau jari, udahnya Iban terus pecaya. Ngambika banding, isu pasal jalai, jalai diberi batu, isu pasal karan tiang api udah bedegi, isu pasal rumah panjai duit diberi ngagai JKKK. Tang Iban enda meda utai ke ba sepiak enggau pelalai politik ari nya laban udah dipeda. Kada enda jalai ke diberi batunya tadi ulih disemin, tiang api ke bedegi patut bisi karang lalu duit JKKK kena ngaga pemansang tang ukai dibagi pintu bilik. Nya alai, komuniti ba siti-siti endur nyamai amat dipusinka bala orang ti bekimpin maya bepilih. Ukai nya aja, enti sema tanah kena rampit projek kompeni luar, baru bala Iban ngeleda laban berasai nyadi penyukung ari sepiak.

Kuasa politik Iban ba Sarawak amat besai, lalu ulih dipeda ari penyampau undi bala Iban iyanya 28% ari undi sereta kerusi. Tang lapa kebuah utai iyaka nyengenda salah enda ulih dipeda? Utai tu enda ngiranka ati laban ari konsep enggau budaya lama sigi udah begaga lalu nyadi bakanya iyanya konsep rumah panjai ( Sabihah, 2000). Siti rumah panjai mesti bisi Tuai Bilik lalu Tuai Bilik dipegai Tuai Rumah. Tuai rumah ke diatu bisi kuasa penuh iyanya tau dikumbai autokrasi ti mit dalam sigi komuniti. Tuai Rumah dipegai Pengulu lalu pengulu ba baruh Pejabat Daerah. Kitai semina ulih ngaitka sida tu enggau perintah ti bekuasa diatu. Tang kitai anang saru laban Tuai Rumah nerima kuasa ukai ari rayat iya agi tang ari Pemimpin ti megai sebengkah-sebengkah sitak. Nya alai, mayuh tuai rumah nyida enda diberi gaji, nadai surat lantikan, sangka ngelaban perintah lalu enda kala teulihka bajet sereta enda nemu ngaul pemesai.

Arinya tadi terang amat kuasa tuai rumah mesti gawa ka orang ti meri jaku. Utai tu enda dipeda tang kuasa tuai rumah megai undi ti cukup besai ba siti siti komuniti. Enti sema rumah panjai bisi 60 pengundi regista retinya dikena ngulihka 60 undinya tadi semina tuai rumah aja mesti ditentuka pengimun enggau penaluk ati ngagai pilih sesebengkah parti. Nya alai nyamai amat deka menang ba kawasan Iban iyanya mesti megai kepala tuai rumah aja lalu undi sekayu rumah nya diempu magang. Ngambika banding, dalam pengawa bepilih Parlimen 2008, sekayu rumah panjai angus ba Tulai Bintangor lalu YB Ding menang laban ngabas penusah nya ti maya hari muai undi, majoriti ke menang pan ulih ari rumah panjai nya. Nya alai, konsep demokrasi ti amat baka ba menua luar enda ulih dikena baka deka mantaika pengingin ati diri enggau bejaku nadai penangi. Utai tu mih dikenang baka bala penulis luar ti nyebut “neither unambigously democratic nor authoritharian” (Crouch dalam Sabihah, 2000). Iban ngundi amat nurun ngundi tang enda nemu bakani tuju ngagai undi diri empu laban bangat enda nemu kuasa politik diri empu (lack of political power) dikena ngasuh orang ke megai polisi pulai ke penguntung sida empu (Dimbab Ngidang, 1995). Utai ke baka tu agi bisi nyadi dalam pengidup enggau komuniti Iban tajapan bisi sekeda nemu tuju iya ti betul. Tang dipelabaka aku lebih agi konsep nya, ngumbai bala wakil rayat dipeda baka raja(Tau dipeda ba ripot Global Witness).

Nyadi diatu, kuasa politik demokrasi iya kuasa rayat ukai kuasa rayat agi.Orang ti dipilih rayat lebih bekuasa ari sida sereta enda tau dilaban. Nyadi penatai undi maya pilihanraya enda dikingatka agi. Siku-siku wakil rayat sigi bediri ari parti politik ti diarika sida, tang udah bediri sereta bisi kuasa sida ulih ngalih parti enggau ngalih batang ari penemu enggau laya antara sida iya aja. Sapa orang ti kena rampit? Sida bala Tuai Rumah. Tuai Rumah lalu mai bala rayat iya mega belaya pasal isu ti digaga bala pemegai tauka wakil sida iya empu (Longhouse chief denies supporting Kilat, The Borneo Post, Dec 29, 2015). Ngambika banding diatu iyanya pemecah Parti SPDP, Presiden Parti ti dulu Tan Sri William Mawan Ikom ngelengka ke parti iya empu lalu mai lima iku agi wakil rayat bukai muka Parti Teras. Iya ke nyadi tanya ditu iyanya nama kebuah Presiden Parti sigi ditemu bisi kuasa Presiden iya ngelengka Parti diri. Nya ukai penanggul ke besai, tang penanggul ke besai iyanya utai tu mai bala Iban bepecah sereta nadai pengempung ti amat. Utai tu mega ulih ngayanka kredilibiti pemegai bansa Iban. Enti disidi, laya Dayak dalam parti tu mega ulih dipeda ari pemun Malaysia ari parti SNAP enggau PBDS dalam taun 1983 nyentukka ngagai parti ke diatu (Jayum Jawan, 1994;136-138)

Iya kelebih ngirauka kitai, sebedau pengawa bepilih tu, bakani kini hegemoni  politik Barisan Nasional sekalika ulih diadu baka selama tauka enda, Isu BN Friendly mayuh amat anggap enggau konsep ti bedau tentu terang dipeda sekalika sida sigi ngarika Barisan Nasional tauka ngelaban Barisan Nasional. Penuduk endur sigi-sigi sitak mega bedau diatur enggau meruan sapa ti patut diengkah tiap parti politik ti betanding maya karang tu ditulis. Sekalika BN Friendly ulih ngelaban BN tauka kaban makai kaban. Tu sigi siti analisis politik ti dianti-anti kitai ti nentuka dua igi parti BN Friendly iya nya UPP (United People Party) enggau TERAS (Tenaga Rayat Sarawak) sekalika amat bekaban enggau Barisan Nasional tauka sigi ari rival dalam Barisan Nasional empu. Pia mega, ulih enda isu tu nyadi pengelebih ngagai pembangkang? Semua tanya tu enda ulih disaut sebedau pengawa bepilih tauka udah pengawa bepilih.

Baka ti diripot Philip Kiew (The Borneo Post, 12 January 2016), Datuk Sylvester Entri Muran agi ngenanka penuduk ba Marudi lalu disukung bala PBB Marudi empu laban bala raban parti nya bebasaka pemutus Ketua Menteri Sarawak Datuk Patinggi Adenan Haji Satem. Entri tu siku ari lima iku orang ti mansutkaka diri ari SPDP. Pia mega iya arapka Presiden TERAS Tan Sri William Mawan ngenanka penuduk lalu deka nambahka penuduk maya pengawa bepilih ti ka datai. Utai tu empai ngirauka ati bala Iban, laban pengawa begagaka parti baru sebedau pengawa bepilih suah amat nyadi ari 1996, 2001, enggau 2006. Munyi ko leka biau, baka wi nampung tali baka rutan tampung danan, mati SNAP bisi SPDP, tumbang PBDS ganti PRS, pecah SPDP bisi TERAS, pecah SUPP nyadi UPP. Nya alai, enti disemaka enggau ba Semenanjung Malaysia tiap bansa endang bisi parti ti kering kediri empu, tang utai tu enda nyadi ba Sarawak. Individu tauka dayakisme nya ti lebih kering agi ari kuasa parti, baka kes 2006 Gabriel Adit ti enda dipilih nyadi pengari BN mayanya suba lalu nyadi calun bebas, tang iya menang ba pengawa bepilih nya. Taja enda dipilih nyadi calun tang menang ari tikit bebas udahnya ngalih ga tudah tuai enggau Barisan Nasional baru (Nidzam & Zaini, 2009;119).

Chara ngundi mega ngayanka pengelemi dalam politik Iban laban sistem ti dikena kitai iyanya first past first post lalu ukai popular vote. Patut iya, kitai mih kering ketegal chara sistem tu tang utai tu tebalit ba menua kitai, ga tubuh kitai mimit tang ulih menang agi ga kitai enda ngena pengelebih nya. Chunto ti semak maya bepilih besai ti udah, BN alah jamah Popular Vote 52% tang menang laban kitai ngena sistem First Past First Post. Tang pengelebihnya tadi enda dikena, indah baka cherita Apai Saloi berumah batu beganti enggau Apai Seumang rumah buluh laban manah munyi dipuputka ribut, maya kudi rumah nya runtuh, munyi aja kitai ke mayuh kerusi tang jaku enda kala pansut ba Parlimen mantaika isu dayak. Arinya tadi endur kawasan menang undi BN dikumbai Fixed Deposit tauka simpan tetap. Tang simpan tetapnya nadai kala diberi bungai untung. Baka ti nunsung baru, bala Iban semina ngemataka aja laban pemimpin ngaga polisi ukai bepanggai ba rayat ti udah nyukung.

Nyadi dalam runding bajet 2016 iya ti dibantaika Perdana Menteri Malaysia, baru kitai meda utai tu baru nyadi ngagai menua Sarawak. Lapa Bajet 2016 nyentuk ngagai orang rumah panjai? Laban pengawa bepilih sigi diatur dalam taun tu lalu Dewan Undangan Negeri deka diserara. Sekalika tu tuju iya tauka enda tang jangka kitai meda utai tu endang sigi patut laban jarang amat ungkup ti besai bakatu kala nyadi dalam pengelama penumbuh menua Malaysia. Meda utai tu dikaitka mimit ngagai pengawa bepilih ti deka datai utai tu ulih meri pengelebih ngagai parti pemerintah lalu ulih nyadika isu dikena ngemenangka Barisan Nasional tang utai tu kebatang endar sigi program perintah besai. Dalam isu pemimpin mega, sida ulih beambi ulih ari isu ti bakatu kelimpah ari dikena ngenanka penuduk pangkat diri empu enggau ngaga false conconciouness ti bakatu.

Kaul isu tu ngagai tuai rumah enggau Pengulu ulih dipeda maya pengawa Pemimpin Bersama Rayat enggau maya mantaika isu ngagai YB ti megai sesebengkah DUN, utai dipinta enggau ditanya nadai utai bukai kelimpah ari Ai, Api enggau Jalai. Uji tanya soalan ti lebih enchabar agi, nama utai ti dikumbai BN-Friendly, nama Isu Dayak ti dikala dibantai ke nuan ba Parlimen tauka Kunsil Negeri, bakani ke runding YB pasal isu 1MDB, 2.6 Billion, nama kebuah nadai parti ungkup orang Dayak, nama kebuah baru deka ngemansangka menua pesisir, kemaya deka nunsung Fixed Deposit BN enggau tanya ti bukai ti nguntungka rayat empu. Tauka tanya rega minyak majak nurun enggau ekonomi menua balat kacau, nama utai ulih digaga orang ti dipilih kita ngurangka tanggung pengidup ti majak niki arika ngaga janji ti kelalu manis maya pengawa bepilih aja( Pyllis Wong, The Borneo Post; January 4, 2016). Pia mega bala Tuai tu patut lebih agi berundingka maya globalisesyen ngasuh kacau ekonomi,ngaga forum tauka randau lalu ngaduka sereta begigaka chara nurunka kos pengidup ti niki, tauka ba jam ti sama enda bula sereta ngemenuhka pengingin rayat empu (ibid.).

Utai bakatu kala nyadi lebuh maya bepilih besai ti udah lalu 2001 enggau 2006 mayuh amat pemimpin baka bala Tuai Rumah diganti. Kitai enda nemu sapa ke lebih bekuasa sekalika rayat dalam rumah panjainya milih sapa tuai tauka orang ke meri lantikkan. Nya alai, maya pilihanraya kes baka pecah rumah panjai nyau nemu nyadi besapat nyadi maya pengawa bepilih ketegal ti enda sepenemu. Demokrasi dipeda enda demokrasi tauka pseudo-democracy laban runding ti enda sepenemu dibai ngagai adat budaya berumah panjai ti ngujungka pekara negatif nyadi ba dalam rumah panjai. Lapa kebuah pekara tu nyadi?  Iban sigi nadai tuai ti kering nya kesatu, kedua laban nadai parti dominan empu Iban, lalu ketiga ketegal chara ngemenangka pangan diri sampai mejal pangan diri enda sama adat enggau pangan. Utai bakatu selalu sereta suah nyadi taja enda diperitaka sebelah surat khabar laban orang ke nyadi mangsa iya bala orang rumah panjai. Sida tu sigi nadai besangkut paut enggau tuai sereta bala orang ti bepilih tang disintak bala sida tu dikena ngulihka undi. Munyi ti dipadahka aku sebedau tu bala Iban nadai nadai parti dominan, bisi sekeda Iban enggau UPP taja pan nya pecah ari SUPP siti ari parti orang Cina (The Borneo Post, 12 Januari 2016).

Maya karang tu ditulis, tiap-tiap iti parti nguji deka engkah calon diri empu ba endur siti-siti dikena nambahka penuduk ba kunsil negeri. SPDP udah diungkupka ba Tasik Biru, Krian, Meluan, Pakan, Marudi, Batu Danau, Bekenu enggau Ba’Kelalan.Pia mega ari 11 penuduk ti baru ti SPDP, SUPP enggau PRS udah diungkupka dua igi penuduk tiap parti pengudah PBB ngeletak peminta lima penuduk (Utusan Borneo, 22 Disember 2015). TERAS enggau UPP bedau temu agi dini endur sida deka engkah manuk sabung diri empu. Tajapan bakanya, maya Adenan mantaika pemutus aum entara iya enggau Najib ba 19 Januari, bala Menteri Muda bisi enggau sidang media mantaika pemutus aum ti ngayanka berapa iti isu autonomi Sarawak  ti uah ulih digaga pemutus enggau menteri besai menua Malaysia. Adenan mega udah netapka penuduk semua calon ya ba 40 iti penuduk ti deka  dibantaika iya nama maya bulan tiga tu ila (Utusan Borneo, 25 Januari 2016). Tai ke nyadi tanda tanya diatu iyanya berapa iti penuduk enggi taui Iban.

Isu autonomi Sarawak enggau Sarawak for Sarawakian diatu udah nyadi isu perintah menua Sarawak. Isu tu kebatang endar ukai isu perintah negeri Sarawak lalu nadai dalam pengingat penylis empu perintah negeri Sarawak maya pegai Taib Mahmud nguji mantaika utai tu. Tang diatu udah nyadika isu lalu dikena BN Sarawak minta mandat lima tahun agi. Enti kitai berunding enggau manah, lapa enda suba perintah Barisan Nasional ngemai isu tu? Endaka lima taun agi ga kitai dikemula baru? Isu tu dulu dibantai bala PKR Sarawak baka Baru Bian ( The Borneo Post, 12 January 2016) enggau Tedong anak Chakaw tauka SNAP dalam keretas kimpin 2011 suba ba Pakan.

“Our demands for increased oil royalty and the recognition of the UEC were rejected, and the use of of English language was met with either criticism or deafening silence fron the BN politicians. It is rather pointless to ask Sarawakians for five more years when it will be five more years of just being ignored.” (Baru Bian , ibid)

Simpul karang

Iban sigi nemu betuai ari kelia, tegal nya kitai bisi Tuai Rumah, Tuai Umai, Tuai Serang, Tuai Gawai, Tuai Pemungkal Menua, Tuai Bejalai, tang diatu Iban nadai Tuai Politik iya nya dalam dunya moden kemaya hari. Taja pan kitai mayuh tuai, tang pemansang politik Iban dipeda demokrasi ti amat laban pengenggai enggau peneka sigi dibantai, tajapan beambi ulih ba pangan diri. Pemansang politik ti batang ya amat patut disempulang enggau penemu iaya pemansang mental enggau psikologi ti berani sereta enti berasai ditanchang enggau adat sereta budaya tang ari runding individual ti deka likun sereta bebas. Ari nya tadi, pilih sereta pengelantang maya bepilih ulih dijapai sereta pengerembai demokrasi ti manah ba menua Sarawak. Tuai baka Yang Behormat Parlimen enggau Undangan Negeri sereta Pemancha , Pengulu, Temenggung enggau Tuai Rumah Iban patut chakah agi ngaga demokrasi ti amat ukai semina bejaku ngelambung bukit manjung pala wung, awaka pemansang chakah agi bejalai ukai semina isu ti enda nemu putus tang putus laban udah mujur.

Kereban Penyanding Penemu

Danny Wong, UPP undertakes 11 projects worth RM260,000 for longhouse folk in Dudong, The Borneo Post, 12 January 2016.

Dimbab Ngidang, the Politics of Developement in Longhouse Communities in Sarawak, East Malaysia, Developement in Practice, Vol. 5, No. 4, (Nov.,1995), lambar 305-312, Taylor & Francis, Ltd on behalf of Oxfam GB.

James Ling, Kapit folk uged to rallybehind BN to trounce opposition, The Borneo Post, 12 January 2016.

Jayum anak Jawan. 1994. Iban Politic and Economic Developements, Their Patterns and Change. Universiti Kebangsaan Malaysia; Bangi.

Nidzam Sulaiman & Zaini Othman. 2009. Pilihan Raya dan Pembangunan Politik Sarawak. Universiti Malaysia Sabah; Kota Kinabalu.

Philip Kiew, PBB Marudi backs Adenan’s announcement on Entri, The Borneo Post, 12 January 2016.

Phyllis Wong, A pearl of wisdom from Taiwan’s first female pesident, thought & opinion, The Sunday Post; January 24, 2016.

Sabihah Osman, Globalization and democratization: the response of the inigeneous peoples of Sarawak. Third World Quarterly, Vol 21, No 6, Lambar 977-988, 2000. Ulih Online Ari Tiga, 22/5/2013 01:12:32 AM.

Utusan Borneo, Berita Iban, Tiong: Sekeda Penuduk DUN SPDP endang balat diperebut, 22 Disember 2005.