Ulih Tauka Enda UMNO tama ngagai menua Sarawak ?

UMNO sigi ari parti politik laut ke balat bekuasa diatu. UMNO tu mega siti ari parti politik apai ngagai bala sida rasuah. Kuasa UMNO berkena ke semua kronisme sida iya empu lalu megai kuasa ngena kaul antara sida.[1] Enti aku ngerintaika penyai sida ditu sigi enda alah. Tang aku mega enda mega ulih nyalahka kebuah sida iya bakanya.

            Maya pembentukan Persekutuan Tanah Melayu parti tu bejalaika tanggul pengawa kena nyerakupka sida di Malaya. Pia mega dalam nudukka menua Malaysia. Tang bakanya mih mensia baka uduk liri diberi makai tai.[2] Udah lama-lama bakanya mih sida iya ngereja pengawa ti kamah enda nemu badu. Utai tu deka dipejuraika aku meda gaya bakani politik Sabah ulih diregau bala sida UMNO.[3]

            Kitai ba Sarawak agi benasit laban apin deka ‘ngelaban perintah’.[4] Ba Sabah, Parti Bersatu Sabah(PBS) ngepun ngelaban perintah dalam taun 1990 an. Tang laya sida tu sigi bepun ari taun 1976. Ari ‘Sixth Tragedy’ ngagai bakani ngulihka bantu ari Persekutuan enti sema megai pengarap Islam maya sida dipegai Harris Mohammad Salleh. Ditu mih kitai nemu bakani ke UMNO ulih tama Sabah enggau meli undi enggau naburka duit ari bilun engkabang, lalu nguji deka nukar ketua menteri antara bansa ke bisi ba Sabah.[5] Nama diatu Musa Aman enda bertukar-tukar ga dih?

            Pulai ngagai batang randau kitai. UMNO ulih tama ke Sarawak enti sema kitai ngelaban perintah. Ukai aku ngeringka Perintah tang nya mih utai ke nyadi maya parti PBS ngelaban perintah. Ketuai sida iya ditangkap baruh ISA ulih Kepala Menteri Malaysia laban enggai begempung enggau Barisan taun 1987.[6] Laban sida PBS ke menang mih mayuh amat pemansang nadai diberi lalu ngagai menua Sabah.[7] Nya alai, anang ‘ngelaban perintah’ laban kitai agi bedau megai ulu lalu kitai ba mata.[8]

            Ba Sarawak, Najib kala datai kitu taun 2000 ngemai UMNO tama Sarawak, tang kitai agi enggai. Tajapan kitai bejai Taib laban beempa ke reta kitai tang nerimaka enda kini kitai iya mega ngenanka ari ke dipegai UMNO. Aku nadaika puku bakani ke iya ulih nagang UMNO tama ngagai Sarawak tang aku nemu bakani ke iya berkeringka PBB ba Sarawak enggaika UMNO tama.[9] Pemesai enggau pengaya Pehin Seri Taib empu ulih ngalahka kuasa ke bisi ba persekutuan enggau Yang Di-Pertua Agong, iya enda ulih dituduh ba SPRM, wakil Parlimen parai nadai mih pilihan raya kecil enggau enda ibuh berimba bulih mih tanah.

            Bah, bakani ke agi enti Pehin Sri Taib Mahmud udah parai ila dih, enda aku enggau orang engkubang pendam iya ila enti sema UMNO tama Sarawak. Tu penangi aku empu. Seagi-agi UMNO agi ba ulu agi mih kitai tu kekitang ba remang enda nemu diri labuh tauka terebai. Bakani ke Iban ila dih? Bakani ke bansa dayak ke idup ila dih? Bakani ke kaul kitai enggau bala Laut ke ngelamatu begulai kunsi kedai makai dih?

            Ko kitai nadai mih utai ke nangi ke nya agi mih kitai tu idup ko sekeda orang ke runding agi ba baruh tachu nyiur. Kebuah ke runding ke bakatu laban berpolitik bertuaika Tuai Rumah enggau Pengulu. Dibai Pengulu enggau Tuai Rumah masuk ‘nyelam’ sekali ko mih sida tu.[10] Nya mih gaya politik kitai diatu, nyau sampaika pecah rumah panjai enti berpolitik anang agi maya kimpin berpilih dih. Tang ke diatu mayuh ga udah nemu reti demokrasi, tang agi mih bedau cukup laban agi meruan orang ke ngembuan buah dadak ditanam ba ujung tanju enggau ujung bilik dikelauk maya berandau politik.[11]

            Engka enda ga aku ulih meragam mayuh. Ngelak ke kitai empu berunding kediri empu. Beraie ke jelu ketegal penegar, beraie ke mensia ketegal pemintar.

---

[1] Kita peda ba GLC, PETRONAS digaga Tengku Razaleigh, isu LEMBU Shahrizat enggau mayuh agi.

[2] Utai tu lebih agi disebut kitai ‘kronisme’.

[3] Ho Khai Leong enggau James Chin.2003. Times Books International. Singapore. Lambar 44.

[4] Anang Ngelaban Perintah sigi Jaku YB kitai Iban , Yang Berhormat James Jemut Masing.

[5] Kepala Menteri ari Orang Dusun ukai Islam, Cina , enggau Bumiputera Islam. Op cit .lambar 46.

[6] Jayum Jawan.1994. Iban Politics and Economic Development, Theirs Patters and Change. UKM, Bangi. Lambar152.

[7] Diskriminasi tu ulih dipeda enggau PBS diciping dalam politik lalu enda ulih berdiri agi ba pengawa berpilih ti ka datai.

[8] Sida iya ulih ngena bakani cara ngelabuh ke sesebuah parti. Baka ba Sarawak, Stephen Kalong Ningkan dilabuhka ngena undang-undang menua siga enggau ngatur penyarut nyadi ba Kuching, PBS mega ngena chara iya ke sama iya ngeletupka Bom ba Kota Kinabalu ngambika undang-undang menua siga ulih dikena. Pia mega utai tu ulih dibaca ba Pakatan Politik Sarawak dikarang Nidzam Sulaiman lambar209.

[9] Utai tu dipeda ba riput Global Witness Video.

[10] Ukai enggai ga aku ngenang. Tu mih utai ke nyadi ba Ulu Julau bala Iban masuk ‘nyelam’ laban ngarapka ‘pemansang’ ke diatu lalu bedau datai-datai. Masuk UMNO endang gerenti patut ‘nyelam’.

[11] Tu mih nyadika kebuah kitai Iban tusah amat deka digempung ke pasal Politik. Aku enda nangika bansa Laut dalam pejalai UMNO ke Sarawak tang orang Iban ke ngembuan buah dadak iya ke dikenangi.