Menua Pesisir

Bakani chara kitai manah meri penemu ngagai orang. Bakatu mih chara aku. Bai sida tu nyepi pemerinsa kitai. Tentu sida iya enggai. Padahka kitai ulah sida ke bejai kitai tang anang madah penyai sida. Retinya nama utai ti digaga sida ti ngasuh kitai merinsa. Mayuh penemu ti ka dipansutka aku ke batang endar, tang sida nadai ngelaban agi.

Dini endur Suruhanjaya Pencegahan Rasuah Malaysia pampang Sarawak?

Sarawak nadai ngembuan siti badan ke ulih ngaturpenyalah makai suap ba menua kitai empu Sarawak. Aku empu agi ingat maya BPR ditukar nama ngagai SPRM, SPRM Sarawak madahka sida bisi tetemuka 600 lebih kes penyalah makai suap enggau salah guna kuasa enggau projek ke nadai digaga maya taun 2009. Berita nya suba tebilang amat enggau pengarah SPRM orang Indu. Tang diatu aku nadai nemu dini endur SPRM Sarawak. Ukai aku bejai pampang tu tang bisi ke enda sida bejalai ke pengawa.

Kes balak, tanah, rasuah kepala menteri enggau kes pengawa bepilih negeri. Aku nadai nemu sigi rita sida bejalaika ripot baikka nya dalam suratkhabar tauka internet tang cherita makaisuap tu jelai amat didinga baikka di rumah panjai, kedai kopi, palan penganti bas, sekula, enggau randau ngasu. Cherita kepala menteri makai duit enggau tanah rakyat semua orang bisi penemu enda ngira laki indu tuai biak. Tang bisi ke enda scherita tu datai ba opis SPRM. Nadai pelaba aku. Sida tu nyamai aku madah ukai badan bebas tang badan ke agi di pegai perintah. Enti kuasa sida tu amat besai, ni cherita kes ke mayuh ba Sarawak nya dih. Ni statement sida senentang reta Taib dih?

SPRM, kitai patut temegah ati laban bisi mega utai bakatu ba menua kitai kena nagang makai suap. Tang ni penyauh pejalai ulih sida. Tanah kitai mayuh udah lenyau, kayu ramu batang engkabang nyau majak nadai, Kampung galau mayuh udah lenyau.Sapa bejual ke semua utai nya, kitai bedau nemu. rega kayu ba makit dunya makin tinggi. Nanga batang rajang makin ngeluaka ramu batang pia mega batang sebuyau. Bisi ke enda kes tu dipansik tauka bisi ripot utai tu baru dipansik.

Kitai Iban empu jarang meda sida tu gawa tauka enda kitai pan enda nemu nama pengawa sida tang kitai beratika utai ti nyadi ba suratkhabar berita radio enggau internet. Enti kita ngiga search ba website SPRM Sarawak empu nadai kes dia. Bisi pan kes nya orang ke nyamai diempa lalu ukai orang ke jelai nama. Anang kitai ngumbai penyalah makai suap ulih punas ketegal bisi SPRM, tang kada end asida nya ke ngasuh pengawa ke bakatu majak nyadi dalam kitai di Sarawak. Laut sigi mayuh gawa dia pelaba aku. Nadai Iban tau megai pengawa tinggi. Pia mega orang ke mangku pengawa dia orang pro perintah aku nulis tu nadai bukti  lalu nyagka pia aja. Laban nama kebuah, enti utai tauka ke projek enda nyadi tentu bisi bayat laut ba dia. Aku enda nyebut semua tang sekeda.

Aku nanya dini endur ukai aku nanya alai. Aku nanya endur laban aku ka bekelala enggau sida lalu nanya nama utai, lalu berapa kes udah tembu diatur sida?

Pemansang Menua Sarawak

Saritu aku macha surat khabar Berita Iban ba http://www.theborneopost.com/2012/01/11/sukung-bn-ti-ulih-mai-pemansang Sukung BN ti ulih Mai Pemansang.

Amat manah rambai jaku madahka BN ulih ngemai rakyat menua pesisir mansang. Utai ke bakatu amat amat dikedeka kitai tang ukai diatu tang ari suba. Mimpi kitai semina deka mansang baka bansa bukai. Utai ke deka dipansutka aku ianya Dini Iban ba Pemansang, Dini menua pesisir ba Sarawak, Berapa Lama kitai udah ba Malaysia, enggau Berapa lama BN udah megai lalu ulih ke enda Parti Bukai megai? Utai ke bakatu ke dulu sereta patut disaut kitai.

Dini Iban ba Pemansang?

Iban ba pemansang dipeda aku ke diatu amat manah. Kitai dalam perlembagaan ianya orang bumiputera sereta sama tinggi enggau bansa laut. Tang dini kitai. Iban ianya bansa Majoriti ba Sarawak tang dini endur iban tu dih tusah amat aku ngiga ba sebelah opis perintah, sekula enggau universiti. Dini kini tunga iban tu? Apu! din bala sida iya, ba endur orang ngaga sepital baru nusun batu bata, nyin sida iya duduk kedai cina baru nyual lada, nyin agi benung nangkal getah tuai ba babas. Bisi aku meda Iban, nyin iya benung deriba moto opis perintah, Bah sapa nepan nya dih? Laut nya. Kini nyual getah tadi dih?  Nyin jual aku ngagai cina tebing ai.

Gaga mih kitai tu dih tama menua Malaysia, laban Malaysia tu menua ke kaya. Enti menua kaya oran pan kaya, rakyat pan kaya. Iban bisi kaya? Bisi, Bala YB enggau tauke Sawit. Orang rumah panjai pan kaya laban enda ibuh meli utai diempa ba pasar. Bisi sungai endur mubu, mukat, enggau nginti. Pia mega ulih ngiga pama . Bisi tanah endur belada, bumai betanam sawit. Udahnya anak nitihka bakanya ga. Manah, enggai ka pengawa bakatu nadai agi dikereja kitai ke dudi ari ila. Enti pia, enda ibuh nurun sekula.

Dini menua Pesisir ba Sarawak?

Aku nemu dini endur nya. enti orang nanya aku bakanya lalu saut iya bakatu. Menua pesisr nadai ba Sarawak pia mega nadai ba perintah Malaysia. Retinya nya menua pesisir bisi tang ukai dipegai Sarawak enggau Malaysia. Bah sapa megai dih? Tu orang megai iya, nadai sapa sapa. Enti kita madah diri empu(orang menua pesisir) rakyat Malaysia, nya manah laban kita bersemangat Patriotik yang tinggi. Udah mansang kita wai? Udah perintah meri kami klinik. Ngena nama ngagi klinik dih. Hiluk( 4WD) laban jalai enda ulih tengah moto bukai moto ya aja mih ulih kena. Nya ni, pegai menua Malaysia nya? Jalai enda digaga anag agi kuasa karan endang nadai lalu. Tiang tower aja mansa tanah tang nadai karan.

Disimpulka aku ditu. Menua pesisir iyanya menua ke dipegai perintah kolonial ngena chara segregasi ekonomi laban jauh amat deka dikemansangka. 2012, 49 tahun dalam perintah Malaysia bisi sekeda bedau datai jalai enggau karan. Iban mayuh berayan dalam sekula. Kelimpah agi ngagai orang menua pesisir enti ka ngiga pengawa enggai enda ngagai menua bukai. Mayuh Iban ba Johor, Singapore enggau kereja ke tasik. Menua ke ditinggal pia aja mh.

Sukung BN ti ulih mai pemansang.

Anang ngelaban perintah laban perintah nya manah. Aram nyukung perintah.Atai-atai tak cukup penadak nadak mih Iban ke nyebut bakatu. Sapa perintah lalu sapa BN? 49 taun megai Sarawak lalu nadai ngaga pemansang. Agi merinsa orang kami agi merinsa iban bedau datai jalai. Tau dudi ke orang ba pasar din. Tau dudi ke politik kita duluka pemansang sekula bansa IBan. Nya baru pemansang. Nyamai aku madah ditu aku sinu ada ba menua ke dikumbai Negara membangun laban menua pesisir bedau membangun. Malu.

Aku ada dalam taun 1991 lalu aku agi ingat pemeinsa mayanya taja mayanya kitai udah tama dalam perintah menua malaysia. Agi berasai aku engkutung maya aku sakit chelap angat dima apai aku ngena selabit sejam bejalai ngagai simpang jalai tumu pagi ngambika ulih nganti moto ba simpang laban jalai ngagai rumah jai enda ulih tengah moto.

Nya ke dikumbai Malaysia udah mansang. Bedau, anang tumu manjung pala wong madahka diri politik pemansang. Malu aku ninga. Teubah aku nemu beguna ke internet maya aku sekondri lalu maya beguna ke talipun maya aku taun enam. aku ngaku diri empu merinsa anak menua pesisir tang laban aku nemu diri. Lalu ngelala nama utai ti udah nyadi dalam sepemanjai pengidup. Anang ngemula ke bansa diri agi ngagai bala tuai  Barisan Nasional.

Parti  bukai.

Tiap kali bekimpim bejai orang aja aja, baka sida iya manah amat enda ngira perintah enggau pembangkang. Nadai orang jai lalu nadai orang manah amat. Uji tak begempung ngemansang ke bansa nyer.  Nadai guna enda beserakup. Enti berebut nyadi tuai, ngalahka diri mih siku.

Politik Facebook

Aku rindu ati enti bisi bala iban empu terbaca ke blog tu lalu nganti kita meri komen ke menyana senentang perkara ti deka dibantaika aku sekali tu.

Dalam pemansang kemaya ari mayuh amat kitai Iban tauka bansa Dayak empu pandai dalam sekula sereta ulih berkenaka teknologi ke diatu. Pia mega utai tu ulih meransang sereta dikena kitai ngenatai ke runding diri empu lalu ulih nyapai mayuh orang. Utai bakatu tau amat ngemansang ke bansa tauka munuh bansa diri.

Ngambika banding aku kala masuk group ba Facebook, Sabah Sarawak Keluar Malaysia. Enggau leka jaku nya aku amat rindu ati engka group tu amat ulih ngaga juluk ati iya lalu meri chara ke ngenatai ke objektif. Siti ari utia ba group tu iyanya sida deka minta perkara 18/20 nyadika puku pinta ngagai Kerajaaan Persekutuan. Nya amat manah, tang siti utai ke ngasuh ati aku kekakang sepengudah aku meri komen senentang isu ba dia, komen aku terus dipejai udahnya aku nadai peluang agi deka ngemansutka runding diri. Pia mega bisi bala bukai enda ulih post dalam group lalu dikumbai orang ke ngelaban sida. Nya alai, aku pansut ari group nya laban sida enda ulih nerima penemu orang bukai lalu terus dipadam ke admin.

Tang siti ari group ke ulih dipasuk dalam Facebook iyanya Sarawak Dayak Mirror. Aku rindu ngagai penemu ke dipansutka sida dalam ngemansang ke Iban lalu penyalah politik Pemegai menua. Utai bakatu tau dipeda kitai ari sitak positif runding enggau komen. Sida ditu lebih bebasa ke komen bala raban, tang sekeda orang enda ulih nerima runding ke dipansut ke bala. Kelikuh ke baka tu tau diguna kitai dalam pengerembai penemu bala raban. Nya alai, sida tu dipeda aku lebih beratika penemu ari meda utai nya jai/negatif  taja sekeda enda mih.

Tang dalam penemu aku empu, politik Facebook ke bakatu nadai mai kini-kini enti enda dikemansangka terus ideologi sida. Tajapan mayuh orang dalam raban tang semina siku aja tauka bala tuai raban aja ngaga pengawa nya nadai guna enti kitai enda ulih mansutka raban ari Facebbok nya pansut ngagai luar lalu betemu betunga mua. Enti kitai semina komen lalu bejaku dalam intenet kitai tau disemaka baka ukui negkadah linau, semina nengkadah nyalak aja tang utai ke deka dijengkau sigi enda datai. Aku nadai peneka agi ngena chara bakatu laban runding aku, ba semua group dia mayu amat penemu lalu penemu nya enda ulih diserangkungka kitai sekali laban berandau ba dia ukai baka berandau baum rumah panjai lalu nadai etika ti patut dititihka kitai.

Nya alai, politik Facebook tu patut diperatika kitai lalu ngiga bakani chara ke patut dikena ngempung ke bansa. Ukai lebih agi bejai orang tang lebih agi ngiga chara. Enti kitai bejai orang utai tu semina mansutka konflik lalu ukai ngiga jalai isu ke dibantai ulih diputarka. Kitai ngiga jalai ukai ngiga penyai. Kitai deka mansang tang nadai jalai. Kitai deka begempung tang nadai alai. Facebook sigi chara tang ukai jalai.

Consensus approach not Conflict aproach. Orang ke dipejai kitai nya mih ke diguna. Ngarapka kitai ulih mansang enggau berunding ngena pala untak ukai pala patung.

Ngarapka Iban enggau Dayak meruan mansang enda ngira politik, sosial enggau ekonomi kitai. Idup ke bansa mih ngena chara ni ke ulih dikena, ngiga jalai ni ke nyamai ditengah taja jalai mayuh enda digaga perintah. Taja orang rumah panjai nadai nemu Facebbok tang kitai tu mih ngena medium tu. Nadai orang bukai dikarap enti enda kitai.

AGI IDUP AGI NGELABAN